fbpx

OmniPork News

壹週刊 Next Magazine

【素食科技潮】研發全素新豬肉 Green Monday楊大偉不收上架費:消費者食過得 唔怕無市場

 

「其實我哋要喺呢個社會製造改變,係件非常孤獨同逆流嘅事,應該係九死一生,又或者十死無生。」社會企業Green Monday聯合創辦人楊大偉(David)茹素至今已有17年,有多重身份的他談起孤獨,則有份外深的感受。由十多年前從美國回港,走進滿是公公婆婆的素食館,David笑指需經常為自己解畫:「我當時26歲,係全場最後生個位,上一輩嘅食客會問我點解咁年輕就食素,係咪受咗咩打擊或是準備出家。」對比外國的素食餐廳早有不同類型,更設有時尚的果汁酒吧;香港發展明顯較單一,對素食者的認知亦偏傳統。

孤獨的感覺非一時一刻,也不單在一個層面;社會企業Green Monday由2012年成立至今,確在走逆流的路。David坦言由鼓勵大家至少每週一天素食,至開設集合超市及餐廳於一身的綠色素食生活館Green Common;到成立創投基金Green Monday Ventures,主力投資跟綠色及食品科技相關的初創企業,此路走得並不容易。父親雖是旭日集團創辦人楊洪,但David沒因此受到特別優待;從商背景反之讓其明白到:「創業係帶有一種浪漫,但亦要平衡理想同實際。」 這比單純的銀彈支持,來得更重要。

76億人的綠色商機

「全世界有八成抗生素都唔係俾人食,而係俾動物食,原因係動物於環境狹窄及惡劣嘅農場內,病係無可避免。」David說話溫柔,語速適中;卻絕不會予人說教感覺,提出的理據均有數字支持,無比實在。最重要的,他除了是一名素食者,亦是一名創業家,在商言商下他指出以植物為本(Plant-based)的食品非狹義得只有素食者市場,「一隻雞要短期內生得咁重咁大隻、一隻牛要提供無數牛奶,大家開始明白到當中係涉及幾多荷爾蒙同激素。」部分人認為人類吃肉只是體現大自然的食物鏈關係,但今時今日吃進肚的或是慢性毒藥,這不單再只是農場傳出殘忍虐待動物、應減少殺生的道德問題,而是關乎人類健康的貼身危機。

兩個月前的颱風「山竹」為港人帶來各種第一身體驗:塌樹處處、玻璃落地開花及在大廈內感到地動山搖。隨著全球暖化加劇,超強颱風近年出現得愈來愈頻密;再多的千言萬語,亦不及人們親歷其中真實。David形容地球正在生病,人們亦逐漸意識到其嚴重性:「人類年長同患病,自然需要同醫療相關嘅事物;其實環保就係地球嘅醫療。」地球入廠,76億人要改變自救,龐大商機因而伴隨危機而生。

創亞洲餐單 迎合本土口味

「香港同亞洲地區嘅大眾對社會改變相對無咁積極,商人就更加係,會問有無前科同成功個案。」其實在外國,研發及推出肉類替代品早成新潮流;如來自美國的植物肉Beyond Meat獲微軟公司創辦人比爾蓋茲((Bill Gates),以及奧斯卡影帝里安納度狄卡比奧(Leonardo DiCaprio)等名人投資。David作為本港的先行者,就緊貼腳步,說服曾表明不會銷售到外地的Beyond Meat引入香港;成功讓Green Common成為美國以外首個引進純素漢堡肉Beyond Burger的地方。

根據美國市場研究Research And Markets顯示,2018年全球肉類替代品市場規模將達46.3億美元(約362億港元),預計到2023年能達63億美元(約493億港元),其中亞太地區將是增長最快的市場。為進一步迎合本港市場,David早前更推出自家研發的植物新豬肉Omnipork,「我哋會將呢啲新產品演變成同香港人及亞洲人有感情嘅食物。」Green Common充份利用煮法繁多的新豬肉,推出不少本土特色食物。跟真豬肉相比,主要由豌豆、非基因大豆、冬菇及米而成的新豬肉Omnipork有更多的鐵質、鈣質及膳食纖維;記者曾親嚐由其煮成的擔擔麵,發現肉質幾可亂真,肥瘦肉分明,口感實在及飽肚。在飲品方面,David也有對準港人需要及口味,「好多亞洲人都有乳糖不耐症(Lactose Intolerance),對乳糖敏感,飲完其實會肚痛去廁所,而加其實有好多替代牛奶嘅選擇。」而餐廳提供的港式奶茶正是以燕麥奶取代牛奶,香味絕不輸蝕,而且營養價值亦高。

定價貼市 入貨具策略

餐廳食物款式眾多,皇牌產品Beyond Burger單售78元,而港女至愛的All Day Breakfast亦只售72元,定價普偏貼近一般餐廳。訪問於中環分店進行,記者觀察到午市時間,餐廳接近爆場,也有不少人早已留位。David指:「其實真真正正以植物為本嘅食物係唔應該貴過肉類,因為減去咗成個範疇;以前種好多植物喂牛喂豬,現時將整個介面減去,直接俾人食。」素食價格以往比普通食物貴,大概因為入貨量少,平均成本因而較高;David對此已有長遠對策:「有機會的話會盡量於台灣及東南亞等相對較近嘅地區生產及入貨,運費成本就會減少。而逐步增加貨量,自然規模經濟(Economies of scale) 都會變好。」Green Common中現有40%為亞洲地區產品,其預料三年後將可增加至60%。

顛覆傳統超市模式

平衡理想與實際,知易行難;Green Common目前有六間分店,分佈在尖沙咀、旺角及灣仔等旺區,租金絕對不菲,David坦承:「我哋會同業主講,希望佢哋將我看待成一位拍檔而非租客,作為一間公司,同我哋合作其實符合企業社會責任(Environmental and social governance),而同時我有信心為呢批商場帶嚟新嘅顧客群,達至雙贏。」他笑指將軍澳中心最近就分享,說Green Common進駐後多了名人、外國人以及出家人進出商場。

而Green Common的超市部亦滿佈林林總總的小品牌產品,如新生精神康復會所推出的有機豆漿「正豆」,令人有耳目一新的感覺。David解釋:「呢類貨品要喺大型超市上架係好難,其一超市會要求佢哋提供銷量報告(track record),細品牌或新產品根本無,其二就係超市會徵收上架費及推廣費等,規模較小嘅公司唔會負擔到。」反之他的團隊卻很喜歡搜羅更種新產品,更以零上架費作招徠,他自信地說:「我哋要成長,細品牌嘅產品都要成長,如果消費者試過係鍾意,我唔相信會無市場。」

資料來源: 壹週刊 https://nextplus.nextmedia.com/article/2_638715_0